Kereja Latih : Pandangka lalu terangka kar Teori Segi Tiga Semiotik ngena chunto ke nemban.

Gambar ba atas nya nunjukka Teori Segi Tiga Semiotik

Nitihka C.K Odgen enggau L.A Richards (1923) dalam bup “The Meaning of Meaning” reti iya ulih dipeda ba tiga iti komponen, iya nya lambang tauka simbol, pikir enggau pekara. Ketiga-tiga pekara nya bekaul rat enggau pangan diri. Teori Segi Tiga Semiotik tu dipenyadi bepelasarka tiga iti komponen iya nya keterubah simbol iya nya leka jaku tauka ayat. Kedua, pikir iya nya konsep ngagai utai ke disebut tauka utai ke dipikir dalam runding. Lalu ketiga referens iya nya pekara tauka penemu.

Nitihka Raminah Hj. Sabran enggau Rahim Syam (1987), simbol nya konstituen linguistik baka leka jaku tauka ayat, referens iya nya pekara lalu pikir iya nya konsep. Dalam Segi Tiga Semiotik, garis entara simbol enggau referens nya putus-putus laban tu nandaka kaul entara simbol enggau referens nya enda besekat.

Bepelasarka langkar ba atas nya, aku deka nerangka enggau silik agi konsep Segi Tiga Semiotik tu enggau chunto ke nemban. Ambika chunto, ba konsep kitai berundingka gamal tauka tukuh ke disebut burung. Nyadi ba runding tu, kitai meragamka gaya gamal burung ke kala dipeda ngelilingi pendiau idup kitai. Nyadi konsep tu tadi ngembuan kaul terus enggau lambang sereta referens. Pengudah kitai berundingka gamal burung dalam untak kitai, dia kitai deka nyebut tauka nulis utai ke bisi dalam runding kitai iya nya b,u,r,u,n,g, lalu tu ti nyadika simbol iya. Pengudah simbol, kitai deka ngaga referens ngagai utai ke disebut nya tadi. Ambika chunto burung tu bisi bulu, nemu terebai, bisi sayap, bisi kaki enggau ngembuan mayuh macham chura. Garis putus-putus entara simbol enggau referens nya nandaka seduai iya nadai kaul terus enggau pangan diri. Kebuah pia laban, enda ulih ngasilka reti ti menyana laban ba peragam gaya tauka tukuh burung ba pikir runding siku-siku mensia nya bebida enggau pangan diri. Ambika chunto, bisi sekeda nya madahka burung nya mit, bechura chelum, lalu bisi sekeda agi nya madahka burung nya besai lalu bechura kuning, mansau sereta gadung. Nyadi ba senentang referens tu iya nitihka peneleba ti diulih siku-siku mensia nya sekalika ari utai ke dipeda, didinga tauka dibacha iya senentang burung nya ti ngujungka referens iya ngagai simbol burung nya tadi bebida enggau orang bukai. Dikena nambah ke nya mega, enti nyema utai nya enda kala dipeda, didinga tauka dibacha kitai, kitai enda nemu konsep utai nya nyadi kitai enda ulih meragamka gambar tauka tukuh utai nya dalam runding kitai. Nyadi enti kitai enda ulih berundingka utai nya, kitai enda ulih meri referens ngagai utai nya taja kitai nemu simbol iya laban nya ari utai ke didinga kitai. Ambika chunto baka “Buah tin”. Nyadi kitai nadai peneleba sereta nadai konsep senentang “buah tin” dalam runding kitai. Simpul iya, simbol enggau referens tu enda ulih ngembuan reti ti nemban enti enda ngena konsep laban mai reti ti nadai besekat lalu ulih berubah-ubah.