Definesyen Fonetik Enggau Fonologi Nitihka Penemu Tebangkar

Raban : PISMP Bahasa Iban Semester 2

Tajuk : Definesyen Fonetik enggau Fonologi

1.    DAVID ABERCROMBIE (1971) :

Dalam bup iya Elements of General Phonetics, madahka fonologi tu sebengkah bidang lingustik ti ngembuan tukuh teknikal. Ari segi penemu, sesebengkah jaku dipeda sechara analitis, iya nya bejaku ukai semina ngemeranka pengawa mending tang begunaka kitai beratika chara organ artikulasyen nya beginsit. Lebuh maya bejaku, angin pansut ari rumbang nyawa ti ngasilka munyi, retinya angin bisi keluar masuk ari lempuang lebuh kitai enseput enggau bejaku.

2.    INDRAWATI ZAHID & MARDIAH SHAH OMAR (2006) :

Dalam bup seduai fonetik enggau fonologi, mantaika pansik pasal munyi jaku ti diasilka mensia. Dalam bup nya seduai iya ngupas baka ni munyi jaku mensia diasilka organ tauka rengka tubuh mensia,  lalu munyi tu bebida-bida entara siti munyi enggau siti munyi. Kelimpah ari nya, seduai iya mega beratika baka ni munyi jaku nya tau dikelaska nitih bansa munyi. Lalu pia mega, seduai iya mansik baka ni jalai peninga tau ngelala munyi ti diasilka orang ti bejaku enggau iya.

3.    PAITOON M. CHAIYANARA (2006) :

Dalam bup  Pengenalan Fonetik dan Fonologi, madahka semua munyi jaku pansut ari mulut mensia. Nya alai bidang fonetik mansik rengka tubuh mensia ti ngasilka munyi jaku.

4.    ABDULLAH HASSAN (2006) :

Dalam bup Linguistik Am, ti mansik leman munyi jaku ti dikena lebuh berandau. Iya mansik munyi ti didinga iya lalu munyi tu tadi dipechah-pechahka iya ngagai unit munyi ti mit agi, lalu udahnya nyeritaka nama pengka tauka biuh reti ngagai orang ti mendingka jaku nya. Iya mega nerangka ni bagi organ sebut ti ngasilka munyi jaku lalu nentuka sekalika munyi ti pansut nya begetar tauka enda, sekali peti sura nyawa nya tutup tauka tebuka. Ari nya tadi, munyi ti pansut nya tau dikelas ngagai vokal enggau konsonan. Munyi nya tadi mega tau ditranskripsyenka, reti nya diberi lambang tauka simbol. Lambang nya mih ti disebut kitai lambang fonetik. Nya alai Abdullah Hassan (ibid) mega mantaika pansik iya pasal sistem tauka struktur jaku. Nitihka penemu anda jaku tu, lebuh mansik fonologi tauka munyi jaku, kitai enda tau enda ngelala ni bagi fonem ti bisi dalam sesebengkah jaku lalu baka ni iya dikena dalam jaku nya. Fonem nya unit jaku ti digaga dikena ngemudahka pengawa ngaga deskripsyen sistem munyi tauka fonologi. Mensia ulih ngasilka mayuh bengkah munyi tauka fon tang semina beberapa bengkah fon aja ti distingtif tauka nyelai. Fon tu mih ti ditusun sereta didijir nyadi leka jaku kitai mensia.

5.    BERTIL MALMBERG (1968) :

Bup Manual of Phonetics, mantaika sekeda asil pansik munyi jaku. Pansik iya tu endang ngemeranka munyi jaku, iya nya unit ti diguna dalam leka jaku ke disebut orang ti bejaku. Lebuh orang ninga, pending napis munyi ti didinga. Nya alai untak nguji ngelala nama bagi munyi ke didinga sereta bebidaka munyi ti diasilka rengka artikulatori mensia. Lebuh maya tu, peninga bedau beratika reti munyi ti didinga iya, semina iya nguji ngelala bagi munyi nya aja.

6.    BERTIL :

Magi fonetik nya ngagaiempat bidang, iya nya penemu fonetik selampur (am), deskriptif, sejarah enggau normative. Penemu fonetik selampur mansik baka ni munyi diasilka sereta enggau fungsi mekanisme jaku iya nya ni bagi organ tauka rengka ti ngasilka munyi jaku nya. Penemu fonetik deskriptif mansik penyelai dalam sesebengkah jaku tauka dikumbai dialek. Iya mansik baka ni bida munyi entara jaku ti sama ulih ngasilka dialek.chunto iya, bida munyi dialek Melayu Kelantan, Kedah, Terengganu tauka Sarawak ari jaku Bahasa Melayu Standard. Penemu fonetik sejarah mansik bagi ubah fonetik sesebngkah jaku bepelasar ba gaya selampur jaku nya empu. pekara ti dipansik dalam hal tu iya nya raban jaku ti nyemilik jaku nya tauka elemen ti bisi sebaka enggau insur ti bisi nyadi ngagai jaku nya dalam kandang sesebengkah timpuh. Bidang penemu ti kepenudi iya nya penemu normatif. Bidang tu bepun ba penemu bala mayuh ti ngumbai jaku standard tauka norma endang bisi dalam raban linguistic enggau raban sosial. Nya alai bidang tu mansik atur tauka rurun ti nentuka jaku ke betul dalam sesebengkah jaku mensia. Jaku ti standard tu dipelabaka deka nyadi jaku ti formal ungkup sesebengkah raban bansa ba siti-siti genturung pendiau.

7.    J.D.O’CONOR (1984) :

Dalam bup phonetics, bisi ngupas penemu ti bekaul enggau munyi ti diasilka mensia. Munyi ti didinga nya tadi lalu diberi tukuh enggau fungsyen dalam raban bansa nya empu, tukuh enggau fungsyen jaku disempikutka sida enggau mesej ti deka dikenataika lebuh sida bejaku. Chunto iya, leka jaku bangku, pening ulih ngaga tukuh ba munyi /b/, /a/, /ng/, /k/, /u/. Tukuh tauka urup tau dipejantilka nyadi leka jaku /bangku/, lalu dipeda fungsyen iya sereta dikaitka enggau mesej ti deka dikenataika. Nya baru munyinya tadi ulih ditemu reti sereta diguna. Iya ke bendar komunikasyen endang udah berengkah dalam untak orang ti bejaku lalu ba peringkat tu, orang ti bejaku nya udah ngembuan dua fungsyen ti bebida dalam untak iya, iya nya fungsyen ngarang penerang enggau fungsyen ngenataika penerang.

8.    Fungsyen ngarang penerang dipeda ari penau orang ti bejaku nya nyimpan penerang ti bebida entara individu, iya nyasesiku orang ulih nyimpan penerang ti mayuh lalu sekeda mimit.  Lalu lebuh bejaku tauka bekomunikasyen, iya nguna semua penerang ti udah disempan iya. Ari segi fungsyen ngarang, orang tau ngidupka komunikasyen tauka randau, iya mega tau nguna penerang nyadika kereban dikena iya berinteraksyen enggau orang bukai lalu penerang nya tadi ngundan mesej ti deka dikenataika iya. Ba sentang fungsyen ngenataika penerang, orang nya tau bejuraika pasal pengawa untak iya nya rengka tubuh ti ngambi bagi lebuh ngasilka munyi. Untak ngenataika jaku padah ngagai saraf (nervous impulses) ti ngaul untak enggau gumpal organ ti betanggungjawab ngasilka munyi jaku iya nya lempuang, dilah, batang rekung enggau  ti bukai. lebuh maya ngasilka munyi jaku, bisi tiga bengkah proses nyadi, iya nya fonetik artikulasyen, fenoetik akustik enggau fonetik auditori.