Sintaksis (Jaku pengawa)

NEPU ANAK IKAN KE DALAM PEGUNG

(Pegari volume 50, Topik : Berita Betanam Betupi)

Ikan dalam pegung tau ditupi sebansa aja (monoculture), tau mega bechampur lebih ari sebansa (polyculture) lalu tau mega ditupi begulai enggau udang galah. Anak ikan ke deka ditepu ke dalam pegung patut sama pemesai ngambika sida enda bealahka pangan diri berebutka pemakai.

            Siti ari pekara ke patut ditemu kitai iya nya chara ikan pegung tu makai. Bisi tiga chara ikan pegung tu makai iya nyamakai nyerapung ba kulit hari ai (surface feeder), makai ba tengan ai (plankton feeder) enggau makai ba burit pegung (bottom feeder). Ikan pegung ke makai ba kulit hari ait u baka kap rumput, lampan jawa enggau kalui, ikan ke makai ba tengan ai nya baka kap pirak, sepat siam enggau tilapia lalu ikan ti makai ba burit pegung nya baka Lee Koh, patin enggau keli. Ba jalai nupi ikan pegung ngena chara polyculture, ikas penyampau ikan ti patut ditupi nitihka chara ikan nya makai (surface:plankton:bottom feeders) iya nya 3:2:1 tauka 5:3:2 tauka 2:1:1. Nupi ikan ngena chara tu manah laban pemakai ke diberi ngagai ikan dalam pegung nya enda tebasau pia ja.

            Anak ikan tau ditepu seminggu sepengudah pegung diberi sum laban maya tu pemakai asal ikan baka pitoplankton enggau zooplankton diadang ending udah bisi dalam ai pegung. Penyampau ikan ke ditepu dalam pegung nya bepanggai ba bansa ikan ke ditupi enggau pemesai pegung kitai.

            Maya ti engkeman alai ngelepaska anak ikan ke dalam pegung iya nya tumu pagi tauka muak ke lemai endar, maya mata panas nyau deka terunjam padam ngambika pengangat ai dalam pegung enggau pengangat ai dalam kambut plastic ti alai nepu anak ikan nya enda kelalu jauh betingka laban pengangat ti kelalu jauh betingka nya tau ngujungka anak ikan nya “stress” lalu mati maya ti dilepaska ke dalam pegung.

            Sebedau ngelepaska anak ikan dalam kambut plastik ke ngundan oksigen ke dalam pegung, rendam dulu kambut plastic anak ikan nya ke dalam ai pegung kira-kira sepengelama 15 minit awakka pengangat ai dalam kambut plastic nya lebih kurang sama enggau pengangat ai di dalam pegung.

Saut Tanya : Nguse Konstituen Frasa Kereja Bepelasarka Siti Lumpung Karang Ke Dipilih

Konstituen tauka leman pengisi frasa pengawa nya jaku pengawa transitif tauka jaku pengawa ukai transitif nyadika teras frasa pengawa. Jaku pengawa transitif mesti ditangkanka objek tauka leman bukai. Jaku pengawa ukai transitif tau mega bediri Kediri tauka ditangkanka leman bukai. Tu nunjukka frasa pengawa tau nyadi ari dijir leka jaku pengawa ukai transitif enggau jaku pengawa transitif dalam ayat pelasar.

Pasuk frasa pengawa :

i.              Jaku bantu + jaku pengawa transitif + objek + penerang

ii.             Jaku bantu + jaku pengawa transitif + ayat komplemen + penerang

iii.            Jaku bantu + jaku pengawa ukai transitif + penembu + penerang

iv.           Jaku bantu + jaku pengawa ukai transitif + ayat komplemen + penerang

      Nguse Jaku Pengawa/Kereja Dalam Lumpung Karang Jaku Pengawa :

1.    Berebutka

2.    Makai

3.    Ngelepaska

4.    Nupi

5.    Nepu

6.    Terunjam

Jaku pengawa ke udah dipasifka :

1.    Ditupi

2.    Ditepu

3.    Diberi

4.    Dilepaska

Jaku Pengawa Transitif (Ngundan Objek) :

1.    Anak ikan ke deka ditepu ke dalam pegung patut sama pemesai ngambika sida enda bealahka pangan diri berebutka (FK) pemakai (Objek).

2.    Ba jalai nupi (FK) ikan (Objek) pegung ngena chara polyculture.

3.    Maya ti engkeman ngelepaska (FK) anak ikan (Objek) ke dalam pegung nya iya nya tumu pagi tauka muak ke lemai endar.

4.    Maya mata panas nyau deka terunjam padam ngambika pengangat ai dalam pegung enggau pengangat ai dalam kambut plastik ti alai nepu anak ikan nya enda kelalu jauh betingka.

Jaku Pengawa Intransitif (Nadai Ngundan Objek) :

1.    Ikas penyampau ikan ti patut ditupi (Jaku Pengawa Pasif) nitihka chara ikan nya makai (FK).